Rev 16 | WSK | STEP | Se ani temple mu ningi kuring bo biyala engel 7 mu nunga manarukaso se ikiem. Mu iwita balam, “Taiwir 7 Kaem ko gomang magara ago anisan sumu gial ago namaral ale ali awete waralko!” mam.

Revelation of John 16

Engel 7 mu taiwir 7 Kaem ko gomang magara ago mu warman

1 Se ani temple mu ningi kuring bo biyala engel 7 mu nunga manarukaso se ikiem. Mu iwita balam, “Taiwir 7 Kaem ko gomang magara ago anisan sumu gial ago namaral ale ali awete waralko!” mam.

2 Se engel motam motam mu ko taiwir giam ago namaram ali awete waram, se lot memek aora aora mu kariimet mel diwang mu ko nup ko kiwol nungumik te taman, ale ko kuar nup patawu se anikasan, mu nungumik te aratu aratu namakaso. ^{▼▼Rev 16:2-3 Lot memek aora aora: Exo 9:10. Gagi gue iwita aratam: Exo 7:17-21.}

3 Se engel 2 mu ko taiwir iluwaram mu gagi awete waram, se gagi mu kari kuera ko gue iwita aratam, se melmasak gagi ningi mu suen la kua sapaman.

4 Se engel 3 mu ko taiwir iluwaram mu yu bibiya se yu gotektek awete waram, se yu mu gue ko geragam. 5 Se ani ikiwerem mu engel yu mu bitaruwaram mu balam:

“O Kaem, ni kako biya, ni ulengkala bagakasam, ale aitak bagasam.
Ni koma memek nungarsam mu diram la.
6 Mu awuk, nuna nika kariimet alo se, nika prophet alo nunga moakasan se gue gikasan.
Se ko koma ni aking gue nungarsam se nasan.
Nuna nunga koma memek diram la to se anisan.” ^{▼▼Rev 16:6 Nuna kariimet nunga moman se kueman ko koma: Rev 17:6; 18:24.}
Engel yu bitaruwaram mu uwuta balam.

7 Asele ani altar te kuring bo aratam se ikiem, mu iwita balam:

“Nunguningta! Kari Biya, ni Kaem Sokel Karogo,
ni nunga betera kaora ko koma te diram la memek nungarsam.”
8 Se engel 4 mu ko taiwir iluwaram mu worem motam awete waram, se worem ko kore kowar mu kariimet nunga kanikaso. 9 Ko kowar aora biya nunguningkiri se ninguru kanikasan, ale Kaem nup balu maguwukasan, mu awuk, nuna ikiman mu nu mel memek kariimet te nunga maguwurokko imitang diruwuwakaso. Bare nuna nunga kilek memek nubiring tumon, giris palagomon, ale ko nup patawomonko me ko kuakasan. ^{▼▼Rev 16:9-11 Nuna me giris palagakasan: Rev 9:20-21; 16:21. Tiromorom biya: Exo 10:22.}

10 Se engel 5 mu ko taiwir iluwaram mu mel diwang mu ko daiga kuwim biya awete waram, se sor mel diwang bitaruwakaso mu tiromorom biya iram. Se kariimet yaman biyala tokasan, ale nungamili usikasan. 11 Lot ko yaman, se yaman duap duap nunga moakaso, se Kaem duruk wonong te bagoso mu kumik te den memek balukasan. Bare nuna kilek memek bita lagakasan mu ko me giris palagakasan.

12 Se engel 6 mu ko taiwir iluwaram mu yu biya Euphrates awete waram, se yu mu maraka saparam, mu koma worem bausa mu te ali supuling te taimonko mu nunga lage nungam. ^{▼▼Rev 16:12-13 Yu Euphrates maraka saparam: Isa 11:15. Dragon, mel diwang, se prophet kawel: Rev 13:11-15.} 13 Asele ani bur memek ilagala suwan, gorogoro iwita, mu arigem. Bo dragon kuring te, se bo mel diwang kuring te, se bo mu prophet kawel kuring te, butata arataman. 14 Bur memek umu kausa kawel duap duap bitakasan. Nuna ali sor suen la ko supuling alo nongote namaman, ale nunga manorman, nuna taimon ale Kaem Sokel Karogo ko tom biya mu ningi kagermonko maman. ^{▼▼Rev 16:14-15 Kager biya: Rev 19:19. Kari Biya tairate tairuk se biririkimonko: 1 Thes 5:1-3.}

15 “Ikialko! Ani tere kari iwita nengete tairikko!
Awiriya marak sinar ago baguruk ale ko guang ko sinar tauk, umutang nu amilmilurukko.
Nu kariimet nomotam te nunguning la dola dola me geragukko.”
16 Se bur memek ali supuling mu nunga bolala awuman, kuwim Hebrew den te Armageddon ^{▼▼Rev 16:16 Armageddon mu Israel sor te, mu gomeng bo wosasel biya, duruk Megiddo ko pingita. Kuwim umutang mu kager suen biya te kagera gilingikasan.} masan mu te nunga bolala awuman.

17 Se engel 7 mu ko taiwir iluwaram mu kualala sisupuram, se temple ningi daiga kuwim biya mu te kuring bo biyala balam, “Bita kutuwuman bo!” mam. 18 Asele pure biliwilik makaso ale biyala pagakaso ale dung gururung makaso, se wanara biya kapakaso. Wanara mu wanara biya nunguningkiri, ulengkala kariimet ali te bagakasan mu wanara bo uwuta kapakaso se me arikasan. 19 Se wonong biya Babylon mu papak mam bilik ilagala suwan. Se sor lilim la ko wonong bibiya maga saparam. Kaem wonong biya nup ago Babylon me ko kuamili saparam, mu nu waen bagunang ago mu tuam se nam. Waen umutang mu noko gomang magara. ^{▼▼Rev 16:19-21 Waen ko den: Rev 14:8-10. Tuwik muguri auram ale tai kapakasan: Exo 9:24.} 20 Se tual gotektek suen biya mena sapaman, se duruk betela menaman. Ale taiti kuali tuwik muguri auram ale manga bibiya iwita tai kapakasan. Muguri mu bibiya, suwan suwan mu ko ikup 40 kilogram iwita, bare tai kariimet nungumik kuali kapakasan se ninguru magakasan, ale ko Kaem nup balu maguwukasan. Mu awuk, memek biya nunguningkiri se.

21